Psa 63 | PMA | STEP | Ahi Asuv, keik kovi Ahi onak, amai kat nau venuk. Maroro kat nau venuk suval koa naro en out memes koa oai tovuol ien.

Psalms 63

Sien onen Koakeil Ahi Kataun Keil

Sam tai onen Deved navong ro suai ran asuv houlu Saul en out volvol en out Sudah (1 Sam 23:14)

1 Ahi Asuv, keik kovi Ahi onak, amai kat nau venuk.
Maroro kat nau venuk suval koa naro en out memes koa oai tovuol ien.
2 Ekvati males visuk en Eim Votut onom,
ekvati malei vis keihoen ka muohien onom.
3 Envatien onom koa korie lati min komai lisenges,
kei tahos imok mulin tounah sav keil en moulien onomai,
sakini nihati lat isom.
4 En avong vasi en moulien onak, nisan masmasien onak minuk,
navong navis, nihati lat hek keilu hehina nesa hehat venuk.
5 Neim en tinok, kosakinau nito en tahosien hesuval koa nakan more anien tai ka nalonge tahos,
ka nisoun souen keil ten masmasien hehat minuk.
6 Navong namul en avet, namundem katuk.
Vongien va rokol out mulan, namules namundem usiluk.
7 Namundem usiluk veni lises kovi kataunien minau.
Nisau hetal masmasien ven koa kokav koe inau suval toahin tai mul kav koe titan keil en apouen.
8 Avong vasi, naro kos vesesal venuk, ka hem kur koe inau.

9 Meatin keil koa asak visi avou vini nau,
kumon keil iha netan en out ten matien.
10 Kisakin keil imatmat en vaeen keil,
ka kisakin huli rendan keil imai ian teiai one.
11 Inau koa nihi asuv houlu ten out Isrel, nihilelau en sien
navong nilesi keke Ahi ling koakeil avavae vatal minau en hek.
Koakeil amumon hatkatien en isen Ahi ihati lat isen,
ka koakeil amul aliluvos, keil ito raeng.